《永遠消失比絕交分手更可怕》
有人曾經講過:「人生之中總有啲人係過客。」
但好多時，當你唔認為對方係過客時侯，而其實你就係對方嘅過客。
有時候，明明曾經係一對好朋友，所玩嘅經歷真係大家都感到開心
大家亦投入感情去建立，亦曾經希望呢段友誼能夠長存
每次拜別時都會約定大家:「喂! 下次幾時再玩過?」
但唔知點解，突然間大家都無哂聲氣
段關係好似突然消失咗咁
每次打開Whatsapp list 望到曾經好好朋友嘅時候，按下去對話，先發覺原來已經好耐好耐無傾過計
不敢反問自己:「我地之間發生過咩事呢? 為何舊知己在最後變不到老友? 點解以前返學嗰陣明明玩得好開心，點解畢業後好似無哂來往嘅?」
接著就會比多理由自己去解釋呢個現象
「大家圈子唔同咪無聯絡囉。」
「以前讀書世界好細，畢業後世界大咗，接觸嘅人多咗，自己地位同重要性亦相對低咗。」
但你無論點去諗解釋都好，都無一個答案，亦唔知對方是敵是友，總之已沒法望透。
正當你想打字搵佢時，卻感到困難
竟然有種唔好意思嘅感覺，好似打擾緊人咁
又或者唔知講咩好，突然間搵返人好似好怪咁
最後種種念頭令到自己不禁嘆息點解攪成咁? 點解搵一個昔日好朋友都要咁多野諗?
最後咩都無打，咩都無Send。
但亦有時侯硬著頭皮Send出去 :「HI~你最近點呀?」
自覺自己踏出第一步，為呢段死因不明嘅關係重新開庭審訊搵出真相
但對方好似一句起兩句止，一問一答咁回應:「都係咁啦。」
就算你不斷搵話題去延續落去，但都感到一股無力感同無奈感
最後等待大家無任何新嘅對話回應大家時候
而你就放棄了
「絕交」呢個詞好似好Old school咁，通常發生係小學雞時期最易講得出口
佢個作用係你起碼知道死因係咩，亦都知道我同對方之間嘅關係已經有共識地斷絕
但突然消失，無論建基於愛情或友情都好
都會令到著緊你嘅人充滿擔心、疑問、難過
你永遠都唔會知道答案係咩，究竟係咪自己做錯咗事而令對方討厭?
最近羅生門一歌，講述男主角單方面戀著對方
但原來對方一早已經放低咗
套入友情身上，獨自回味和可惜雙方之間嘅關係
但可能對方心目中，自己好似從來無出現過喺佢生命之中
其實所謂友情要維繫，雙方都有責任
因為好自然就會探討到 " 你唔搵人 定係 人地唔搵你呀? "
why not both?
我自己曾經有私人問題煩擾住而咩人都唔想見
最近好了點，所以我都勇敢地踏出第一步，瘋狂地為某死去友情帶來希望。
有啲人成功約出來食飯，聚會間大家笑著屌黎屌去，彷彿大家友情絲毫不減 (即使兩年無見)
嗰刻先明白到 咩叫做『 來年陌生的，是昨日最親的某某 』呢句嘅意思
亦有啲人繼續一問一答方式對方，最後無疾而終，再傾落去就變了煩膠
喺《宅女》故事入面，我提及到『感情樹』係需要每日都去培養，每日都要去用心去打理，如果有一日，或者有一段時間唔去好好打理棵樹，唔去投入感情......咁樹枝就慢慢淡，最後咩顏色都無，成條樹枝都會消失咗。"
同樣地，當有雙方都唔搵對方一排後，到你想搵返對方時，你就後悔了。
所以
勇敢地踏出第一步，搵下你地嘅好朋友出黎食住飯
然後好似以前咁，笑柒大家屌柒大家嘻嘻哈哈過日子。
如果做咗都無效果嘅話，咁都無計
唯有聽住『最佳損友』，然後接受呢個死亡原因。
早知解散後各自有際遇作導遊
奇就奇在接受了各自有路走
卻沒人像你讓我眼淚背著流
嚴重似情侶講分手
最佳損友-Eason
https://www.youtube.com/watch?v=yoD8r9uoZvA
Search